Beynəlxalq Muğam Mərkəzinin direktoru Murad Hüseynov Avrasiya Xalqlar Assambleyasının təşkilatçılığı ilə Beynəlxalq müzakirədə iştirak edib 

Avrasiya Xalqlar Assambleyasının təşkilatçılığı ilə  “Mədəni diplomatiya humanitar vektordur - “Böyük Avrasiya Tərəfdaşlığı” adlı beynəlxalq onlayn müzakirə keçirilib.  Beynəlxalq layihə  Beynəlxalq Muğam Mərkəzi (Azərbaycan), UNESCO-nun himayəsi altında Mədəniyyətlərin Yaxınlaşdırılması Mərkəzi (Qazaxıstan), Kadis Universitetində Şərqi Avropa və Mərkəzi Asiya Beynəlxalq Universitet Mərkəzi  (İspaniya) tərəfdaşlığı ilə keçirilib. Müzakirənin məqsədi Avrasiya məkanında əməkdaşlıq, qarşılıqlı anlaşma, müxtəlifliyin və mədəni plüralizmin qorunması üçün effektiv alət kimi mədəni diplomatiyanın inkişafına kömək etməkdir. 

Kadis Universitetinin rəhbəri Andres Santananın moderatorluğu ilə keçən müzakirələrdə “Mədəniyyətin birləşdirici potensialını necə aktivləşdirmək olar”, “Yaradıcı və yaradıcı şəxsiyyət şüurunun formalaşmasında sənətin rolu nədir”, “ Xalqların mənəvi mədəniyyəti sivilizasiyanın gələcəyinə necə təsir edir”, “Mədəni diplomatiya və ictimai təşkilatların vəzifələri” mövzularında çıxışlar dinlənilib. 

Tədbirdə  Avrasiya Xalqları Assambleyasının Baş katibi Andrey Belyaninov, Beynəlxalq Muğam Mərkəzinin direktoru, Xalq artisti Murad Hüseynov , tanınmış musiqiçi, sənətşünas Mixail Kazinik ,   UNESCO-nun xoşməramlı səfiri, Avrasiya Xalqları Assambleyası baş katibinin müavini Aleksandra Oçirova, Qazaxıstanın Xalq yazıçısı Oljas Süleymanov və assambleyaya üzv olan dövlətlərin sənət və elm adamları çıxış ediblər.   

BMM-nin direktoru Murad Hüseynov çıxışında bildirib ki, mədəniyyət bütün bəşər sivilizasiyasının inkişafının təməl daşı olmaqla, insanları dinc təşəbbüslərə, mənəvi harmoniyaya və beynəlxalq tərəfdaşlığa doğru istiqamətləndirən ümumbəşəri əsas dəyərləri gücləndirmək üçün etibarlı potensiala malikdir. Müasir dünyada baş verənlərə əsas təsir göstərə bilən beynəlxalq dialoq üçün şərait yaradan vasitələrdən biri də mədəniyyətdir. 

Müzakirələrin sonunda iştirakçıların Ümumdünya İctimai Sammitinin gündəliyinə dair təklifləri dinlənilərək qəbul edilib.